ഉത്സവങ്ങൾ / ' S A P

⬛
*ഉത്സവങ്ങൾ*
▪

ഉത്സവങ്ങളെ നമുക്ക്
അടുത്ത് നിന്നും
അകലെ നിന്നും
നോക്കിക്കാണാം.

അകലെ നിന്ന് നോക്കിയാൽ
കുറച്ച് വർണ്ണ ബലൂണുകൾ
എല്ലാം ഒരൊറ്റ നിറത്തിലേക്ക്
ചുരുങ്ങിയത് പോലെ.

അടുത്ത് നിന്ന് നോക്കിയാൽ
കുറെ വർണ്ണ ബലൂണുകൾ
കണ്ണഞ്ചിപ്പിക്കുന്ന നിറശോഭയോടെ
വിശാല ലോകത്തോട്
സംവദിക്കുന്നത് പോലെ

എങ്കിലും ചിലത്
തറവാട്ട് ദൈവങ്ങളുടെ
ദൈവം കെട്ട് മഹോത്സവങ്ങൾ പോലെ
കാവുകളിൽ മാത്രം ഒതുങ്ങിപ്പോകും.
സ്വന്തം നിഴലുകളിൽ
തണൽ തേടുന്നത് പോലുള്ള
പാഴ് വേലയാകുമത്.

ഈദും ദിപാവലിയും
നിന്റേയും എന്റെയും
ആഘോഷമാകുന്ന കാലത്ത്
സ്കൂൾ പ്രവേശനോത്സവങ്ങൾ
വന്നത് നന്നായി.

ആഘോഷിക്കപ്പെടാതെ പോകുന്ന
ചില ഉത്സവങ്ങളുമുണ്ട്.
മൗന പ്രാർത്ഥനകളായി
പകൽ സ്വപ്നങ്ങളിലെ
വിഷാദ രംഗം പോലെ
സങ്കടങ്ങളുടെ പെരുമഴക്കാലം
തീർത്ത് കടന്നു വരുന്നവ
ആഘോഷങ്ങൾ അവസാനിക്കുന്ന
തുരുത്താണത്!

*എസ്-എ-പി*

⚫