*കൂട്ടായ്മ* *കുന്നായ്മ* *പരിമിതി* / അസ്ലം മാവിലെ

*കൂട്ടായ്മ*
*കുന്നായ്മ*
*പരിമിതി*
............................

അസ്ലം മാവിലെ 
............................

എല്ലാ കൂട്ടായ്മകളുടെയും പരിമിതി എന്ന് പറയുന്നത് നോട്ടങ്ങൾ തുറിച്ചു നോട്ടങ്ങളെന്ന് തെറ്റിദ്ധരിക്കുന്നു എന്നിടത്താണ്. ഒറ്റപ്പെടലിന്റെ അലട്ടലാണ് ഒന്നിച്ചിരുത്തത്തിലേക്ക് എത്തിക്കുന്നത്. ഒന്നിച്ചിരുന്നാലോ ? ഒന്നായ്മയ്ക്ക് പകരം കുന്നായ്മയിലേക്ക് വഴിമാറിപ്പോകുന്നു. പിന്നെ, പുറത്തെ ബഹളങ്ങൾ തങ്ങൾക്കെതിരെയുള്ള തുറിച്ചുനോട്ടങ്ങളും കണ്ണുകടിയുമായി തോന്നും.   വാർപ്പു തീരുമാനങ്ങൾക്ക് പാഠഭേദങ്ങൾ വരുമ്പോൾ അകത്ത് നിന്ന് തന്നെ കല്ലുകടി അനുഭവപ്പെടും. കുറച്ചു കൂടി കഴിമ്പോൾ സ്വഭാവിക ഭിന്നാഭിപ്രായങ്ങൾ വരും. ഉൾക്കൊള്ളാൻ മനസ്സുണ്ടാകുന്നിടത്ത് കൂട്ടായ്മകൾ ഒന്നിച്ചു മുന്നോട്ട് പോകും. ഇല്ലെങ്കിൽ നടേ പറഞ്ഞ കണ്ണുകടി അകത്തുള്ളവരോടും പറയേണ്ടി വരും.

അമീബയുടെ പ്രജനന രീതിശാസ്ത്രം  മനുഷ്യക്കൂട്ടായ്മകളിലാണ് വളരെ ഭംഗിയായി അപ്ലൈ ചെയ്തു കാണാറുള്ളതെന്ന് തോന്നുന്നു.  പരിമിതികൾ തിരിച്ചറിയുക.   ഇതിനു മുമ്പും സിവിലൈസ്ഡ് ലോകം അതിന്റെ ഭ്രമണപഥത്തിൽ വട്ടം കറങ്ങിക്കൊണ്ടിരുന്നു,  ഇപ്പഴും അങ്ങിനെതന്നെയാണെന്നുമുള്ള തിരിച്ചറിവുണ്ടാകുന്നിടത്ത് മാത്രം കൂട്ടായ്മകളുടെ സാന്നിധ്യത്തിന് പ്രസക്തിയുള്ളൂ. പ്രതീക്ഷയുള്ളൂ. (കുറച്ചു കാലത്തേക്കെങ്കിലും) നിലനിൽപ്പുമുള്ളൂ.

NB :
ഇന്ന് രാവിലെത്തന്നെ വായിച്ച ഒരു വാട്സാപ് മെസ്സെജ് ഇങ്ങനെ :
"പലർക്കും പലവിധ  അഭിപ്രായങ്ങൾ ഉണ്ടാവാം. അത്   മാനിക്കുക. ഓർക്കുക  നിങ്ങളുടെ   വലതുവശം,   നിങ്ങള്ക്ക് അഭിമുഖമിരിക്കുന്നയാൾക്കു  ഇടതു വശം  ആയിരിക്കും. (ചില കാര്യങ്ങളിൽ  second  opinion  എടുക്കാൻ  മറക്കരുത്.) "

FB യിൽ ഇന്ന് അതിരാവിലെ  ഒരു പുതു കൂട്ടായ്മക്കെതിരെ ഒരഭ്യുദയകാംക്ഷിയുടെ  കണ്ണുകടി പരിഭവവും കണ്ടു. 

..................................