പരീക്ഷ തുടങ്ങി രാത്രി മൈക്ക് വെച്ച് ശല്യം ചെയ്യരുത് / അസ്ലം മാവിലെ

*പരീക്ഷ തുടങ്ങി*
*ആരാധനാലങ്ങൾ*
*പാർട്ടിപ്പരിപാടികൾ*
*രാത്രി മൈക്ക് വെച്ച്*
*ശല്യം ചെയ്യരുത്*
.........................
അസ്ലം മാവിലെ
.........................

കേരളത്തിലെ മുഴുവൻ സകലമാന വിശ്വാസിക്കമ്മറ്റിക്കാരോടും ഒരഭ്യർഥന. പരീക്ഷ തുടങ്ങി, ഇന്ന്  മുതൽ. രാത്രി ആരാധനാലയങ്ങളിൽ നിന്നും അതിന്റെ പരിസരങ്ങളിൽ നിന്നും നിങ്ങൾ രാത്രി ഒച്ചയും ബഹളവും വെച്ച് ശല്യം ചെയ്യരുത്.

പ്ലീസ്, സഹിക്കാൻ പറ്റാഞ്ഞിട്ടാണ്. മണിക്കൂറുകൾ നീണ്ട് നിൽക്കുന്ന നിങ്ങളുടെ അലറലും അതിനപ്പുറവും ശല്യമാണ്. കുട്ടികൾക്ക് ഒരു വർഷത്തെ അധ്വാനമാണ് അത് വഴി നഷ്ടമാകുന്നത്.

തൊട്ടടുത്ത വീടുകളിൽ നിങ്ങളുടെ മക്കളെ പോലെ തന്നെ പുസ്തകം തുറന്ന് വെച്ച് ഞങ്ങളുടെയും മക്കളുണ്ട്.  ഒന്ന് പുസ്തകം മറിച്ച് നോക്കുമ്പോഴായിരിക്കും തൊണ്ടകാറൽ തുടങ്ങുക.

നിർത്തീൻ. മതിയായി. ഇനി അഥവാ ഒച്ച വെച്ചേ അടങ്ങൂവെങ്കിൽ വൈകിട്ട് 4 മണിക്ക് തുടങ്ങി 5:30 ന് നിർത്തൂ.

പാർട്ടി പരിപാടികൾ, പ്രസംഗങ്ങൾ എല്ലാം പരീക്ഷ തീരും വരെ രാത്രിയിലേക്ക് വെക്കരുത്. വൈകുന്നേരത്തോടെ തീർക്കണം.

പലർക്കും പറയണമെന്നുണ്ട്. നിങ്ങളൊക്കെ ശപിച്ചു കളയുമോ എന്ന പേടി അവർക്ക്. ആ ഒരു പേടി തരിമ്പുമില്ലാത്ത ഞാൻ ഇവരടക്കമുള്ളവർക്ക് വേണ്ടി അഭ്യർഥിക്കുന്നു - പരീക്ഷ തീരും വരെ രാത്രി മൈക്കോണാക്കി നിങ്ങൾ ഒച്ചയുണ്ടാക്കരുത്. നിങ്ങളുടെ ഒച്ച കേൾക്കാതെ ആകാശം ഈ ഇടവേളയിൽ ഇടിഞ്ഞു വീഴുകയൊന്നുമില്ല. സ്വിച്ച് ഓൺ ചെയ്യാതെ തന്നെ നിങ്ങൾക്ക് വന്നവരോട് തൊണ്ട കാറി പറയാമല്ലോ. ▪